Nagagwa sa pauna nga imbestigasyon nga ginplanuhan sang duha ka menor de edad nga estudyante ang insidente sang pagpangluthang sa isa ka buluthuan sa Tacloban City, santo sa Department of Education (DepEd).
Ginpahayag ni Education Secretary Sonny Angara nga may mga indikasyon nga madugay na nga ginhandaan ang insidente.
Base sa impormasyon nga nakuha naggikan sa adviser sang isa sa mga suspek, masami nga nagahipos lang ang estudyante kag nagpahibalo nga may kadtuan nga aktibidad sa Maynila.
Suno diri, wala man nagsulod sa klase ang estudyante isa ka semana antes matabo ang krimen.
Suno kay Angara, natukiban sa imbestigasyon nga may kasugtanan na ang mga imbolbado base sa pagbaylohanay sang mensahe sa online.
Apang ginklaro sini nga indi pa ini ang pinal nga konklusyon samtang nagapadayon ang imbestigasyon.
Personal naman nga nagpadulong si Angara sa Tacloban City agud magpakighinun-anon sa mga opisyal sang lokal nga panguluhan, Philippine National Police, mga tiglawas sang DepEd, kasubong man sa mga manunudlo kag personnel sang San Jose National High School.
Suno naman kay DepEd Undersecretary for Operations Dr. Malcolm Garma, wala ini nagapati nga resulta sang bullying ang insidente bangud kun lantawon, wala man sang partikular nga target ang mga suspek kag random ukon wala sang may ginpili nga tawo ang ginpangtiro.
