Kumpirmado na nga magatambong sa Special Mass Wedding sang Bacolod City si First Lady Liza Araneta Marcos karun sa hapon.
Sa intervew sang Bombo Radyo kay Bacolod City Civil Registrar Head Atty Hermilo Paoyon, preparado na ang city government sa Mass wedding para sa 2,023 couples nga ipatigayunon karun alas 2 sang hapon sa Bacolod City Government Center.
Suno diri, alas 9 subong nga aga, umpisahan na ang pagpirma sa mga dokumento para malikawan ang pagginutok nga gilayon magasugod ang martsa alas 2 sang hapon.
Ginbanta man sini nga kapin 8,000 tubtob 10,000 ang magatambong bwas para sa kasal sang 2,023 couples, kag bangod sini ila igasira ang dalan nga ini ang mahatag nga pwesto para sa bisita sang mga couples.
Gina-ekspektaran man ni Paoyon nga maghatag sang pahayag ang first lady para sa mga kalaslon, samtang yara naman sa kapulisan ang pag-organisa sang security para diri.
Pahanumdom ni Paoyon para sa mga couples, ila itsekyar nga insakto kag husto ang ila nga ginabutang nga impormasyon nga suno diri, libre ang kasal apang mahal ang pagpakorek kun may sala.
