Gindugukan sang publiko ang pagbukas kahapon sang MassKaNamit Food Exploration Festival kag MassKaAuto Car Meet sa Upper East, Megaworld nga nag-umpisa alas-5:00 sang hapon.
Madamo man sang mga kilala nga mga restaurants ang nagtukod sang ila nga mga tolda kag nagplastar sang ila nga mga baligya.
Magluwas sa mga kalan-an, may-ara man sang mga ginapatigayon nga events kaangay sang pagtukar sang live bands.
Sa pagtsekyar sang Bombo News Team sa festival site, ekskulsibo man nga na-interview ang alkalde sa syudad nga natabuan nga nagalibot sa area kaupod sang pila ka mga konsehal kag mga bisita.
Sa ambush interview sang Bombo Radyo Bacolod kay Bacolod City Mayor Alfredo “Albee” Benitez, ginpakamaayo sini nga matahway, innovative kag maayo ang pagplastar sang mga kiosko sa Upper East, Megaworld.
Dugang pa sini nga sa ikapito nga adlaw sang kapiestahan, wala pa sang nareport nga mga insidente may kaangtanan sa Masskara Festival ang napulo ka Police Station sa ciudad.
Magluwas nga wala sang narecord nga dalagko nga krimen, fully booked naman ang tanan nga mga hotels nga nagapakita nga madamo ang mga nagbisita sa ciudad para sa kapiestahan.
Gin-athag sini nga madamo pa sang mga balantayan sa masunod nga semana kun sa diin ginapaabot ang pagbisita ni President Ferdinand “Bongbong” Marcos Jr kag sang First Family, pila ka mga Senador, kag madamo pa sang magapasundayag nga mga performances gikan sa nanarisari nga mga banda kag celebrities.
Ginpasalig naman ni Police Captain Peter John Ramos, Ground Commander sa Upper East, Megaworld nga sila ang nagplastar sang Police Personnel sa nagkalainlain nga bahin sa venue para sa seguridad sang mga pumuluyo kag bisita.
May-ara man sang mga natala nga entry kag exit points agud matsekyar ang mga nagasulod sa venue.
Kabug-usan nga 102 ka mga Police personnel ang gindeploy agud magbantay sa nasambitan nga festival site.// Sa pagbanta sini as of 8:30pm, yara na sa dos mil tubtob tres mil ang kadamuon sang nagbisita nga publiko sa MassKaNamit Food Exploration Festival.
Paathag ni Ramos nga 24 oras nga nagabantay sa palibot ang mga kapulisan kag sila ang magaseguro sang lugar tubtob sa Oktobre 22.
