Opisyal na nga ginsuspinde ni Bacolod City Mayor Evelio Leonardia ang MassKara Festival 2020 nga pagahiwaton sa bulan sang Oktubre.
Sa Executive Order No. 62 Series of 2020 nga ginpagwa ni Leonardia, suspendido ang tanan nga mga aktibidad nga may kaangtanan sa MassKara Festival sa bilog nga Oktubre kun sa diin may yara sang penalidad ang sin-o man nga magalapas.
Ini ang ginlakipan sang parade, street dance competitions, exhibits, road shows kag dance, talent, singing, beauty, costume, kag pyrotechnic contests.
Nalakip man diri ang concert, sports events, bulang, open market/food/plants/wares/apparel fairs, industrial/commercial fairs ukon bisan anu nga pagtililipon sang mga tawo.
Ginmanduan man ni Leonardia ang Business Permits and Licensing Office nga indi mag-issue sang business permit ukon license to operate sa bisan ano nga aktibidad ukon kahiwatan.
Ang permit ukon license to operate nga naisyu na sang opisina antes ang executive order ang deemed revoked ukon cancelled.
Naghingyo man ang alkalde sa Sangguniang Panlungsod sang Bacolod nga likawan ang pag-isyu sang permit ukon license para sa bisan ano nga aktibidad nga may kahilabtanan sa 2020 MassKara Festival celebration.
Samtang, ginpahayag sang City Administrator sang syudad sang Bacolod nga ang ginpagwa nga executive order sang alkalde ang kabahin sang precautionary measures sang syudad batok sa paglapta sang COVID-19.
Suno kay City Administrator Em Ang, ang paghiwat sang Masskara Festival ang makaganyat lang sang madamo nga tawo kag indi na maobserbar ang physical distancing.
Gindugang man ni Ang nga proven and tested na nga ang pagdinaguso sang mga tawo ang isa man sa paagi sang paglapta sang COVID-19.
