Matunga sa tatlo ka semana ang patigayunon nga Masskara Festival 2022 sa Oktobre.
Suno kay Bacolod City Councilor Jason Villarosa, Chairman sa Committee on Tourism sa Sangguniang Panlungsod ang una nga semana, Oktobre 1 tubtob 9 ang pagabug-usan sang Sports Activities.
Paathag sini nga luyag ni Bacolod City Mayor Alfredo “Albee” Benitez nga himuon nga olympic style ang una nga semana sang Masskara Festival gani halos tanan nga sports nga sarang malakip sa programa.
Ang programa ang mangin invitational agud nga indi lang Bacolodnon ang maka-enjoy.
Target sang Bacolod City Government nga makapasulod sang masobra 100,000 nga mga guests gikan sa gwa sang Bacolod.
Ginpakigbahin sang konsehal nga kalakip sa gin-imbetar para sa billiards si Efren Bata Reyes kag Jango Bustamante kag madamo sang iban pa.
Samtang ang ikaduha nga semana ang patigayunan sang cultural activities.
Kalakip diri ang mga food fairs, convention sang mga salakyan, convention para sa mga bike enthusiasts kag display sang mga produkto sang kada Barangay sa syudad sang Bacolod.
Ginalauman ni Villarosa nga magahugpong sa aktibidad ang tanan nga Barangay sa syudad.
Ang pagdisplay sang mga produkto ang patigayunon sa nagkalainlain nga venue nga ginalakipan sang Bacolod City Government Center, Malls kag may itukod man sa Lacson Street antes ang highlight.
Samtang ang ikatatlo nga semana amo ang mangin highlight sang event kun sa diin patigayunon na ang Electric Dance Masskara.
Maga-imbetar man ang syudad sang masobra 10 ka mga celebrities kag may patigayunon nga Fund Raising Nights.
Paathag ni Villarosa nga mangin mahal ang ticket sa fund raising nights nga himuon nga kaangay sang Gala Night samtang ang proceeds ang magakadto naman sa nagkalainlain nga sektor.
Suno sa konsehal yara sa 15 ang team nga mangin magkasumpong sa Electric masskara apang mahimo pa nga mabuhinan.
Samtang nagdangat naman sa 17 ang competitors para sa Street Dance Competition nga nasanto sa mga Barangay nga nagpadala sang letter of intent.
Apang sa subong nga tuig nga Masskara Festival, wala naman sang School Category para sa paindis-indis.
Ini bangod wala nila ginpahanugutan ilabi na nga 50 porsyento palang ang face-to-face classes kag sa Nobyembre pa ang full implementation.
Suno kay Villarosa, indi man nila luyag nga ang Masskara Festival ang mangin kabangdanan agud magkaproblema sa pagbukas sang in-person instruction sa mga eskwelahan.
