Ginkumpirmar sang Chairman sa Committee on Tourism sa Sangguniang Panlungsod sa Bacolod City nga madayun na ang Masskara Festival sa Oktobre.
Suno kay Councilor Jason Villarosa, ang Masskara Festival ang pagapangunahan sang Yuhom Bacolod Foundation.
Aminado ang konsehal nga tuman na ka excited ang mga Bacolodnon sa kaangay nga mga festivals kaangay na lamang sa nangin selebrasyon sang Tanduay Rum Festival nga ginhakos sang madamo nga mga pumuluyo.
“Balik Yuhom” naman ang tema sa subong nga selebrasyon.
Paathag sang konsehal nga madamo kuntani sila sang theme nga naplano apang nakasugtan kaupod sa alkalde nga mangin focus sang tema ang pagbbalik sang yuhom sa Bacolod makaligad sang COVID-19 pandemic.
Pasalig ni Villarosa nga bilang Committee Chair on Tourism, kaupod kay Bacolod City Mayor Alfredo “Albee” Benitez nagahulag na ini agud nga maplastar ang mga requirements kag mapasa sa nagakaigo nga talatapan sang gobyerno kaangay sang Bureau of Internal Revenue (BIR) kag Securities and Exchange Commission (SEC) agud nga mapatigayon ang Masskara Festival 2022.
Suno kay Villarosa, apisar nga ginahingyo sang SEC ang two-year requirement para sa Foundation, ginapakamaayo sang konsehal nga gintugutan ang Yuhom Bacolod Foundation bisan wala pa ini nakadangat sa kaangay nga kalawigon apang bangod sini, ang foundation ang indi makabatun sang funds gikan sa gobyerno kag magagamit lang sang budget gikan sa pribado nga mga sektor.
Dugang pa sini nga sila ang nakapreparar na tatlo ka bulan na ang nakaligad tubtob sa selebrasyon sa Oktobre nga patigayunon sa sulod sang tatlo ka semana.
