Madinalag-on nga napatigayon kagab-i ang Salubong sa Masskara Festival 2023 sa Bacolod City Government Center.
Nangin masadya ang ginpatigayon nga opening salvo kun sa diin alas-5:00 pa lamang sang hapon, umpisa na nga nagperform ang pila ka mga local bands sa ciudad sang Bacolod.
Ini ang ginsundan pa sang performance gikan sa Masskara dancers.
Isa-isa man nga ginpakilala ang 15 ka mga kandidata nga magapaindis-indis para sa Miss Bacolod Masskara 2023.
Samtang nagpagwa naman sang teaser para sa labing una nga electric diva competition.
Nangin highlight man sa salubong sa Masskara ang pagperform sang banda nga The Juan.
Antes ang alas-12:00 sa tungang gab-i, nagbuya man sang malip-ot nga mensahe si Bacolod City Mayor Alfredo “Albee” Benitez.
Kaupod sang alkalde sa stage ang pila ka mga konsehal kag opisyal sa ciudad sang Bacolod.
Suno diri, igahatag nila ang best Masskara subong nga tuig.
Pasalig sang alkalde nga madamo sila sang ginpreparar nga mga events kag mga aktibidades, kag madamo man sang magaperform nga mga entertainers sa kabug-usan nga pagsug-alaw sa kapiestahan.
Ang Masskara Festival 2023 ang opisyal nga ginbuksan pinaagi sa fireworks display.
Sa ginpatigayon nga pagsalubong, nagdangat sa 15,000 ang crowd nga nagtipon.
Sa enterview sang Bombo Radyo Bacolod kay Mayor Benitez, gin-agda sini ang tanan nga luyag sang kalingawan nga magpadulong lamang sa Bacolod City bangod puno sang entertainment ang subong nga Masskara Festival 2023 nga mas ginpadako pa kun ipaanggid sa garboso nga kapiestahan tinalikdan nga tuig.
Subong nga tuig, nag-imbetar ang ciudad sang K-Pop Band nga magaperform kag madamo nga mga celebrities kag banda.
Ginalauman man sini ang pagtambong ni President Ferdinand “Bongbong” Marcos Jr, kaupod sa first family kag pila ka mga senador sa highlights sa Street Dance and Arena Competition sa Oktobre 22. Samtang, Ala-1:00 karun sa hapon, natalana naman nga magpatigayon sang screening para sa mga nagpasakop sa Handog Dance Showdown Competition sang Bombo Radyo kag Star FM sa Masskara Festival 2023 sa City Mall Mandalagan.
Ang Handog Dance Showdown Competition sang Bombo Radyo kag Star FM sa Masskara Festival 2023 ang patigayunon na sa Oktobre 20.
