Igashorten ukon buhinan na ang inadlaw sang MassKara Festival subong nga tuig.
Sa interview sang Bombo Radyo kay Mate Espina, public relations officer sang Yuhum Foundation nga amo ang organizer sang festival, mismo si Mayor Alfredo Benitez ang nagsuggest nga buhinan ang duration sang festival bangud tuman gid man ka lawig ang isa ka bulan.
Nagikan sa isa ka bulan, himuon nalang nga tatlo ka weekends ang MassKara Festival 2023.
Sa karon, ginaproject nga patigayunon sa Oktubre 6, Biyernes, ang opening salvo kag magatakop ang festival sa Oktubre 22 ukon may duration nga 16 ka adlaw.
Suno kay Espina, may activities nga patigayunon sa SM City, Bacolod Public Plaza, Lacson Street, Upper East kag sa Bacolod City Government Center.
Ang final nga activities ang ipagwa sang Yuhum Foundation kun mapirmahan na ang kontrata sa tunga sang city government kag sang foundation.
May yara sang public hearing sang Lunes kag ginahulat sa karon ang authority to sign nga igahatag sang Sangguniang Panlungsod kay Mayor Alfredo Benitez agud nga mapirmahan na ang kontrata sang city government sa Yuhum Foundation.
Sa tion nga mapirmahan na ni Benitez ang kontrata, igaanunsyar naman sang organizer ang selling of the kiosks sa tanan nga festival sites.
Nagpanugyan man ini sa mga ginatanyagan sang kiosko sa subong nga tinion nga indi pa ini legal bangud indi pa allowed ang foundation nga maghimo sini.
Sa karon, may pila na ka kompaniya nga nagpalapit sa organizer agud magpabutyag sang ila interes nga magsponsor sa festival nga ginakabig isa sa pinakadako nga festival sa bilog nga pungsod, apang indi pa maka-deal sa ila legally ang foundation bangud wala pa sang kontrata.
