Madamo sang mga nakalinya nga mga aktibidad sa Masskara Festival 2025 kag isa na diri ang PWD G: Masskara PWD Got Talent nga pasakupan sang mga Person with Disabilities.
Sa interview sang Bombo Radyo Bacolod kay Mimai Arban, Organizer sang PWD G: Masskara PWD Got Talent, sa nasambit nga event ipakita sang mga Bacolodnon nga PWDs ang ila mga talento kag abilidad.
Subong nga adlaw, Oktubre 7 patigayunon ang mga events sa Ayala Malls Capitol Central.
Suno kay Arban, subong nga aga may yara sang magic show para sa mga bata nga may autism spectrum nga tambungan sang Special Education students kag may yara man sang professional talks kasubong man sang gift giving sa mga kabataan kag ginikanan nga may special needs.
Magluwas sini may yara man sang trade fair ang mga PWDs kun sa diin iga-showcase ang ila mga produkto.
Karun sa hapon patigayunon ang PWD G: Masskara PWD Got Talents, kag diri ipakita ang mga abilidad kag talento sang mga PWDs.
Suno kay Arban, dako ang ila nga pasalamat kay Bacolod City Mayor Greg Gasataya kag Gugma Foundation President Rodney Ascalon nga ginlakip ang PWD sector sa selebrasyon sang Masskara Festival 2025.
Suno diri, ginpabatyag sa karun nga ang nasambit nga sector ang kabahin sang komunidad kag ginhatagan gid sang tion nga makapakita sang ila mga talento, abilidad kag ikasarang.
May yara sang 15 finalists sa got talent kag ang first price ang P8,000, P6000 sa second prize kag P2000 para sa consolation prize.
