Nangin madinalag-on ang pagselebrar sang highlights sang 45th Masskara Festival sa ciudad sang Bacolod.
Kahapon, natapos nga madinalag-on ang ginpatigayon nga street dance and arena competition sa pagpa indis-indis sang pito ka mga barangay.
Sa interview sang Bombo Radyo Bacolod kiay Councilor Jason Villarosa, chairperson sang Committee on Tourism sa Sangguniang Panlungsod sang ciudad sang Bacolod, ginkalipay sini nga nangin manami ang panahon kag natapos ang highlight nga successful.
Nagdaog sa competition ang Brgy Granada nga nagbaton sang special award nga may P100,000 cash prize; best in music nga may P25,000 cash prize; theme and concept nga may P25,000; mask and costume nga may P25,000; kag Bacolod Yuhum Foundation Choice award nga may P15,000 cash prize.
Over all champion ang Brgy Granada kag nagbaton sang P1 million cash prize, samtang P500,000 ang nabaton sang Brgy Bata bilang first runner up kag P300,000 cash prize ang nabaton sang Brgy 12 bilang second runner up.
Tuman ang pagpasalamat sini sa tanan nga Bacolodnon, Negrosanon kag mga nagbisita sa Masskara Festival kag nagpromisa nga ang selebrasyon sa sunod nga tuig ang lauman nga mas better kag bigger sangsa subong.
Samtang, wala naman mahimo ni Bacolod City Mayor Alfredo ‘Albee’ Benitez nga magtambong sa highlights sang Masskara Festival kahapon bangod nga sang hapon dali-dali ini nga nagpadulong sa Manila bangod sa importante nga meeting.
