Natalana nga igaanunsyar ni Presidente Rodrigo Duterte kun sin-o ang mangin masunod nga pinuno sang Philippine National Police.
Suno kay Duterte, ang napilian sini nga mangin masunod nga PNP chief sa listahan nga ginhatag sa iya ni Interior Secretary Eduardo Año ang natalana kuntani nga igaanunsyar kahapon, Martes apang tubtob sa karun wala pa nakapagwa sang anunsyo ang Presidente.
Ini kasunod sang nagahilapit nga pagretiro sa serbisyo ni PNP chief General Dionardo Carlos sa Mayo 8, 2022, isa ka adlaw antes ang Eleksyon, bangud magadangat na ini sa edad nga 56-anyos.
Si Carlos ang ika-pito nga PNP chief nga gin-appoint sa idalum sang administrasyon ni Duterte sang Nobyembre 12, 2022.
Suno kay Año, duha ka mga senior police officials ang iya ginrekomendar.
Kun ang PNP leadership naman ang pagasundon, si PNP Deputy Chief for Administration Lt. Gen. Rhodel Sermonia sang PMA Class of 1989 ang yara sa masunod nga pwesto apang ang pagpili sang PNP chief ang yara sa idalum sang discretion ni Duterte.
Magluwas kay Sermonia, si PNP Deputy Chief for Operations Lt. Gen. Vicente Danao Jr. ang isa sa mga ginapilian nga katapo man sang PMA Class of 1991 kag si NCRPO Chief M/Gen. Felipe Natividad nga miyembro sang PMA Class of 1990.
