Arestado ang isa ka high ranking official sang New People’s Army sa Barangay Camindangan, Sipalay City, Negros Occidental kun sa diin nakuhaan pa ini sang armas kag ginapatihan shabu.
Kaupod ang Philippine National Police (PNP) Joint Law Enforcement Security Operations kag 15th Infantry (Molave Warrior) Batallion sang Philippine Army naaresto ang 43 anyos nga ginkilala kay Radino Villacarillo nga may mga alyas nga Romil G. Villacarillo, Poldo, Rading, Ado, Kanor, Baldo, Tauros kag Yongyong.
Si Villacarillo ang karun nagapungko nga Regional Committee secretary sang 2nd National Urban Center ukon anay ginatawag nga Cebu Party Committee nga amo ang nagaserbe nga military hardware liaison sang Komiteng Rehiyon-Negros, Cebu, Bohol kag Siquijor.
Isa man ini ka Commanding Officer sa Rehiyong Sentro De Grabidad Komiteng Rehiyon- Negros front.
Committee Member man ini sa North Negros Front sang rebelde nga grupo.
Narecover gikan sa paghinakop ni Villacarillo ang pila ka mga war materials kaangay sang isa ka cal. 45 automatic pistol, isa ka magazine, duha ka hand grenade, duha ka laptop computers, walo ka cellular phones, duha ka pocket wifi, external drive, apat ka USB, isa ka indi rehistrado nga motorsiklo kag mga subersibo nga mga dokumento.
Nakuhaan man sang suspected shabu ang suspetsado gani magapangatubang ini sang mga kaso nga paglapas sa Republic Act 10591 ukon comprehensive firearms and ammunition regulation act kag Republic Act 9165 ukon comprehensive dangerous drugs act of 2002.
