Patay ang ginakabig nga high-ranking NPA leader sa Kilometer 109, Barangay Dancalan, Ilog, Negros Occidental nagligad nga Agosto 31 matapos ginaalegar nagbato sa otoridad kadungan sa pagserbe sang warrant of arrest sa iya.
Ginkilala ang NPA leader kay Mitchel Fat ukon alyas “Lakas”, squad leader kag kilala bilang high-value individual sang Central Negros Front.
Sa interview sang Bombo Radyo Bacolod kay Lt. Col. Erwin Cariño, Commanding officer sang 15th Infantry Battalion, ginpahayag sini nga magaserbe kuntani ang gintingob nga pwersa sang militar kag kapulisan sang tatlo ka mga standing warrans of arrest apang hinali lang nga nagpalupok ang suspetsado sang caliber .45 pistol rason nga nagbalos man ang tropa nga nagresulta sa pagkaigo sang bala sa iya lawas.
Suno kay Cariño, ginhingagaw pa ini kuntani dala sa Lorenzo Zayco District Hospital sa ciudad sang Kabankalan apang gindeklarar nga dead on arrival.
Nakuha sa possession ni alyas “Lakas” amo ang isa ka caliber .45 pistol; isa ka magazine sang caliber .45 pistol nga may apat ka bala; duha ka fired cartridge case sang caliber .45 ammunitions; isa ka duyan; isa ka sling bag kag iban pa nga mga personal nga kagamitan.
Suno kay Cariño, ang pag-neutralize sa NPA leader ang kasunod sang paghatag sa ila sang tip angot sa presensya sini sa lugar sang isa ka residente.
Nahibaluan nga si Alyas “Lakas” ang lider sang grupo nga sa likod sang brutal nga pagpamatay sa apat ka mga pulis sa Ayungon, Negros Oriental nagligad nga Hulyo 18, 2019.
