Gin-athag sang labor advocate nga mahimo makatuga sang pagtaas sang unemployment rate ang pagpasaka sang Estados Unidos sang taripa sa mga produkto gikan sa Pilipinas.
Sa interview sang Bombo Radyo Bacolod kay Wennie Sancho, Secretary General sang General Alliance of Workers Association (GAWA), mahimo magresulta sa tarrif retaliation ang iban nga mga pungsod ang 17 porsyento nga pagpasaka sang taripa kag ini ang mangin global economic problems.
Pahayag sini nga sa pagpasaka sang dako sa taripa sang mga produkto gikan sa Pilipinas, magadyutay man ang demand bangod ang mga bumalakal ang magapili sang iban nga brand nga mas barato.
Suno diri, sa pagsaka sang taripa, pasakaan man ang presyo sang produkto ukon ini ang ginapapas-an sang gobyerno sang America sa mga pumuluyo.
Ginakahangawa ni Sancho nga sa pagnubo sang demand, mahimo nga may pila ka kompanya nga mamierdihan kag maputo, nga magaresulta sang pagkadula sang madamo nga trabaho.
Kalabanan sa mga produkto sang America nga ginapasulod sa Pilipinas amo ang sa patag sang teknolohiya, samtang ang Pilipinas ang naga-export naman sang nanarisari nga produkto.
Ginakasubo man sini nga sa masami, sa Pilipinas kag sa iban pa nga Asian countries ginapadala sang America ang ila mga spare parts bangod sa barato nga labor costs, ginadala sa Estados Unidos, kag mahal na antes magbalik sa Pilipinas.
Suno diri, makatuga sang global economic problems ang posibilidad sang trade war ukon pagbalos sang iban nga mga pungsod kag pagpasaka man sang taripa sa mga produkto sang America.
Ini ang indi naman mahimo sang Pilipinas bangod kita ang dependent sa Estados Unidos.
Aminado si Sancho nga indi mabal-an ang pinsar ni US President Donald Trump bangod ini ang pabag-o bag-o kag gilayon nga ginapatuman ang bisan ano nga magsulod sa iya pinsar.
Panawagan sini sa mga economic experts sang gobyerno nga tun-an ang trade agreement sang Pilipinas sa Estados Unidos para sa economic survival sang pungsod.
Hingyo sini nga hatagan sang gobyerno sang atensyon ang economic problems kag indi lamang magtutok sa kaso ni former President Rodrigo Duterte sa International Criminal Court.
