Ginaduso sang Alliance of Concerned Teachers’ ang pag-abolish sang MATATAG Curriculum sa panindugan nga ini ang nagahatag lamang sang dugang nga kabudlayan sa mga manunudlo.
Sa interview sang Bombo Radyo Bacolod kay ACT Bacolod City – Negros Occidental Chapter Secretary General Grace Abellar, ang ACT ang nagsugilanon na kay Department of Education (DepEd) Secretary Sonny Angara tuhoy sa panawagan nakaligad nga semana.
Panindugan sini nga nagasampok ang rationalization sang workload santo sa Magna Carta for Teachers kag sa ginapatuman nga DepEd Order No. 005 nga nagahatag sang overtime pay.
Suno kay Abellar, santo sa Magna Carta for Teachers, may maximum nga 360 minutes nga contact time ukon pagtudlo ang mga manunudlo sa kada adlaw.
Apang sa karun nga MATATAG Curriculum, ang mga manunudlo nga may tatlo lamang kuntani nga subject ang kinahanglan magtudlo sang pito tubtob walo ka subject.
Panindugan ni Abellar nga ini ang tuman ka makapoy bangod kinahanglan pa maghimo sang dugang nga lesson plan sang manunudlo.
Dugang pa sini nga ang sadto oras sang pagtudlo nga nakadepende sa subjects ang ginbag-o kag ginhimo nga balanse nga 45 minutes kada subject.
Ini ang magatuga naman agud nga magdangat na lamang sa 300 minutes ang contact time sang manunudlo nga mas manubo sa 360 minutes nga nakapagkit sa Magna Carta for Teachers.
Sa pihak nga bahin, ang overtime pay naman ang macater lamang kun magabulos sa absent nga manunudlo, apang kun maga-overtime agud mahatag ang nagakaigo nga oras sa pagtudlo, ini ang wala na sang bayad kag makabig na lamang nga voluntary works.
Suno kay Abellar, imbes nga makabulig, ang MATATAG Curriculum ang nagahatag pa sang libog kag kabudlayan sa mga manunudlo.
