Dako ang kalipay sang Math Olympiad team sang Technological University of the Philippines- Visayas sa pagdaog sa provincial level kag sa karun nagahanda na para sa national level competition.
Sa interview sang Bombo Radyo kay Engr Jovanie Española, ang coach sang team, kada tuig may yara sang annual event ang Institute of Electronics Engineers of the Philippines (IECEP) kun sa diin may yara sang mga students nga magacompete para sa walo ka math subjects.
Suno diri, may yara sila sang ginpatigayon nga elimination round para pilion ang tatlo ka estudyante para magcompete.
Gikan sa pulo ka students, apat ang ginpili kun sa diin ang tatlo ang magacompete samtang ang isa naman ang reserved member sang team.
Wala naman nangin mahapos ang preparasyon sang team bangod may yara lamang sila sang duha ka semana antes ang adlaw sang competition.
May yara sila sang review kada vacant time kag after class nga nagatapos kun kaisa alas- 7:00 tubtob alas- 8:00 sang gab-i.
Suno sa coach, nag-umpisa sila sa pagreview sang Setyembre 2, para sa competition sa Setyembre 14, apang apisar sa madali nga tion nagdaog ang team sang TUPV.
Mensahe ni Española sa tanan nga mga estudyante, kun may kabudlayan sa Math nga subject mas maayo nga magpractice regularly kag mangayo sang bulig kag ang pag-intindi suno diri ang dapat nga may kaupod nga effort sa pagtuon. Samtang, nangin inspirasyon naman para sa mga kabataan ang Math Olympiad team sang Technological Univerity of the Philippines- Visayas.
Sa interview sang Bombo Radyo sa Electronics and Communication Engineering (ECE) students nga miyembro sang team, halos tanan sila ang maluyagon nga magtuon sa Math.
Suno kay Keir Allen Gan, una ini nga napressure sa competition apang nalipay man ini sa opportunity nga ginhatag sa iya.
Para sa iya, dako nga factor sa pagtuon sang mga kabataan ang manami nga environment, suporta sang ginikanan kag maayo nga manunudlo.
Suno naman kay Jhavhe Arangorin, sadto wala ini hilig sa Math apang ginkonsiderar sini sa gihapon nga magsulod sa engineering nga course.
Suno diri, ang tanan sini nga gintun-an humalin sang elementarya tubtob sa kolehiyo ang iya gid tanan naggamit.
Suno diri, dapat hatagan sang importansya kag epektibo nga method ang bata agud nga maenjoy sini ang pagtuon.
Dako naman ang pasalamat ni Floyd Andrei Gulmatico sa team sini nga nagpakita sang teamwork sa ila nga pagdaog.
Suno diri, mismo siya ang nagpili sang math subject nga luyag sini nga tun-an bisan wala pa sini natake-up pa ang subject samtang naga-eskwela.
Nakabatyag man ini sang kakulba sa competition apang nalipay ini nga yara ang iya team nga nagabuligay.
Madamo naman sang naagyan na nga math competition si John Louie Guzon kag indi na bag-o para sa iya ang liwat naman nga mangin kabahin sang mga competition.
Suno diri, siya ang reserved member sang team kag kun kaisa siya ang nagatindog bilang proctor kag para sa iya ang tanan nga experience sini sa Math ang isa ka life changing journey.
