Gin-athag ni Bacolod city councilor Celia Flor nga ang Women’s Month celebration ang wala naga-atake sa mga lalaki apang ini ang para sa lalaki kag babayi nga dapat magbuligay sa pagpatin-ad sang komunidad.
Sa interview sang Bombo Radyo sa konsehal, makita na sini sa komunidad nga tunga sa populasyon amo ang mga babayi kasubong man nga nakita sini ang presensya sang mga kababainhan sa tanan nga sektor sa sosyudad.
Suno diri, importante nga mahatagan sang pagkilala ukon recognition ang mga babayi kun sa diin iban ang naga-excel na kag nagapakita nga indi lamang ang mga lalaki ang may ikasarang nga magpamuno.
Kun sadto halos ginapakita lang nga ang babayi ang yara sa sulod sang balay para magluto, maglaba kag manghimos, sa karun suno kay Flor, sarang naman sang mga babayi nga magtrabaho kaupod ang lalaki.
Samtang, ginpasalamatan man sini ang pagbaton sang mga kalalakihan sa nagasanyog nga role sang mga babayi.
Kasubong man nga ginakalipay sini nga sa karun ang mga iloy kag amay sang younger generations natrain na ang lalaki kag babayi nga dapat may equality.
Luyag man sang konsehal klarohon nga ang adbokasiya para sa kababainhan wala naga-atake sa lalaki apang ini ang nagasuporta sa lalaki kag babayi para sa equality sa pagpasanyog sang komunidad.
