Wala na sang kasudlan kag balahibo ukon nakahigot na lamang nga tiil ang nabilin matapos nga ginpatay ang 15 ka mga manok sa gina-alegar nga aswang sa Concepcion Subdivision, Barangay Caduhaan, ciudad sang Cadiz, kaina sang aga.
Sa interview sang Bombo Radyo kay Marnie, bata sang tag-iya sang mga manok, alas 4:00 sang kaagahon na sang nakita nila ang 15 nila ka manok nga inugbulang nga may kabug-usan nga balor nga kapin sa P30,000 ang lunsay mga patay na.
Suno diri, wala ini nagapati sa aswang, apang alas 12:00 sang kaagahon may nakita ini nga babayi nga pula ang mata, itom, kag malaba ang buhok nga nagapungko sa kilid sang ila balay.
Gilayon naman sini nga gintawag ang iya amay.
Kapin alas 4:00 sang kaagahon nasapwan na lamang nila ang mga manok nga, iban wala na sang kasudlan, iban wala sang ulo, may yara nga tiil na lamang nga nakahigot ang bilin kag may yara man nga balahibo na gid lamang ang makit-an kag dugang pa sini, kaangay nga ginpangkagat kag ginkaon ang mga sapat.
Ginsuroy man sini ang area kun sa diin nakita sini ang gina-alegar nga aswang kag nakita nga may isa ka manok nga wala na sang kasudlan nga ginapatihan ginakaon sang babayi sang nakita sini nga nagapungko sa kilid sang ila balay.
Sa pagtsekyar naman sa CCTV camera, wala narecord ang hitabo bangod nga na-cut ang recording sini kag nag-resume na lang sang patay na ang mga manok.
Pahayag ni Marnie, indi man mahimo nga ini ang kahimuan sang ido bangod nga na-cage ang mga ini kag wala man sang may dali-dali nga makasulod bangod sa mataas nila nga pader nga may wire pa sa babaw.
Dugang pa sini, ini pa lamang ang una nga beses nga may nahitabo nga kaangay sini sa ila lugar.
