Madamo sang wala na sang karelasyon, wala pa sang kwarta.
Apang paano ayhan kun ikaw ang tanyagan sang kwarta kabaylo sang pagsulod sa isa ka relasyon ukon pagpakasal?.
Kaangay sa isa ka district sa Busan, South Korea, kun sa diin sila ang nagatanyag sang P42,000 sa pagsulod sa relasyon samtang P842,000 naman sa magapakasal.
Ang Saha District ang magahiwat sang mass blind dating event para sa “single Korean and foreign men and women” sa Oktubre.
Ini para sa mga naga-edad 23 kag 43 anyos, nga nagapuyo ukon nagatrabaho sa lugar.
Ang lalaki kag babayi nga magsulod sa relasyon pagkatapos sang kahiwatan ang pagahatagan sang 1 million won ukon P42,000.
Samtang kun magpatigayon naman ang mga ini sang “sang-gyeon-rye,” isa ka pagtililipon sang mga katapo sang pamilya antes ang kasal, sila ang hatagan sang 2 million won ukon P84,000.
Samtang kun magpakasal nagid mismo, 20 million won ukon P842,000 ang nagahulat sa mag-asawa.
Magahatag man ini sang dugang nga suporta sa pamilya tubtob sa lima ka tuig.
Sa karun wala pa na-anunsyar ang mga pagsulundan sang nasambitan nga kahiwatan.
Kun ang hilikuton sini nga tuig ang mangin madinalag-on, himuon ini nga isa ka tuigan nga kahiwatan kag mas madamo nga mga partisipante nga indi Koreano.
Ang proyekto ang gindesinyo agud masolusyunan ang demographic crisis bangod sa tuman nga pagnubo sang populasyon sa South Korea.
