Ginamonitor sang Bacolod Police Station 2 kun manghold-up pa ang mga kaupod ni Arian Mark Salaver sa Aki Cuadra Robbery Group matapos nga ini ang ginpatay sa balay sang iya tiya sa Purok Cabacawan, Barangay Villamonte, ciudad sang Bacolod, Pebrero 9 sang gab-i.
Sa interview sang Bombo Radyo kay Police Capt. Paul Vincent Pendon, station commander sang Bacolod Police Station 2, personal ini nga nagapati nga si Arian Mark alyas Jokjok ang nagaduso sa mga kaupod niya sa robbery kag Akyat-Bahay group agud matigayon ang mga krimen sa Barangay 2 kag iban pa nga bahin sang ciudad, kag indi ang ginatudlo nga lider sang Aki Cuadra Robbery Group nga si Arnold Cuadra.
Suno kay Pendon, apat tubtub lima ka mga tawo ang ginamonitor sang Police Station 2 nga kaupod ni Salaver.
Sa karon suno sa station commander, ginapanilagan sang kapulisan kun mangsulod-sulod pa sila sa area subong nga patay na si Jokjok.
Suno sa police official, madamo sang nabiktima ang robbery group apang nahadlok sila nga maghambal kag magfile sang kaso.
