Patay ang duha ka chinese national matapos ginluthang sang utod sang isa sa mga biktima sa Brgy. Bubog, ciudad sang Talisay, sang Biyernes.
Sa interview sang Bombo Radyo Bacolod kay Police Major Rhazl Jim Jocson, Deputy Chief of Police sang Talisay City Police Station, ang duha ka biktima amo sanday Sammy Tan kag Peter Lee samtang ang suspetsado naman amo ang manghod ni Sammy nga si Jimmy Tan.
Suno diri, nakit-an nga nagsulod sa opisina si Jimmy kag nakigstorya kay Sammy apang gulpyada lang nga may nabatian nga lupok.
Nagsulod si Peter sa opisina para tsekyaron ang sitwasyon apang nasugat-an sini si Jimmy kun sa diin siya ang ginluthang man.
Suno kay Jocson, ginalantaw nga may kaangtanan sa kwarta ang natabo nga pagluthang ni Jimmy sa iya magulang.
Sa karun, ginahitso na ang pagpasaka sang kaso batok sa nadakpan nga suspek.
