Ginkumpirmar sang alkalde sang San Carlos City, Negros Occidental nga wala naga-eksister ang tatlo ka mga flood control projects nga gintumod sang Department of Public Works and Highways Central Office nga yara sa ciudad.
Sa interview kay Mayor Renato Gustilo, nakabaton ini sang sulat nagikan sa DPWH national office nga ginapakumpirmar kun may yara gid man sang tatlo ka mga flood control projects nga gintukod sa ciudad kasubong man ang ginpadala nga acceptance letter nga may pirma sini kag sang personnel sang City Engineers Office sang San Carlos City.
Ang sulat ang nabaton ni Gustilo antes ang 4th Station of the Nation Address (SONA) ni President Ferdinand “Bongbong” Marcos Jr.
Suno sa alkalde ang nasambit nga mga proyekto ang wala nagaeksister ukon “ghost” flood control projects samtang ang pirma sini sa acceptance letter ang indi iya kag ginapahayag nga ini ang gin-forge lamang.
Bangud sini, ginmanduan niya ang City Legal Office nga magpadala sang sulat kay National Bureau of Investigation Director Jaime B. Santiago agud nga maimbestigaran ini.
Hugot nga ginpanginwala sang alkalde ang nasambit nga mga flood control projects ang wala naga-exister sa San Carlos City matapos nga ini ang ila nga nakumpirmar gikan sa DPWH San Carlos City Engineering District.
Ang tatlo ka mga proyekto ang ginalakipan sang isa ka P77.5 million; isa ka P77.3 kag isa ka P151.5 million.
Suno kay Gustilo, ang P151.5 million nga yara nahamtang sa Palampas River sa Barangay 1 ang contractor sini amo ang Apo General Construction nga nakabase sa Mt. Province, samtang ang P77.5 million flood control nga nahamtang sa Andoon River sa Barangay Poblacion nga gin-ubra naman sang E.K.C. Construction nga nakabase sa Benguet kag ang P77.3 million flood control sa Jigalaman River, Barangay Guadalupe kun sa diin ang contractor amo ang Jaben General Contracting and Eng’g Services nga nakabase man sa Benguet.
