Ginapatun-an ni Bacolod City Mayor Alfredo ‘Albee’ Benitez ang paghatag sang penalidad sa mga nagpost sang fake news sa social media.
Suno sa alkalde, nagmando na ini sa legal kag enforcement agency sang ciudad sa pagpangita sang mga indibidwal nga ginhalinan sang post nga nakatuga sang panic sa publiko.
Madumduman nga madamo sang mga naglapta nga posts nga nagapaandam sa ginaalegar mga van nga nagapang-abduct.
Isa sa mga litrato nga gingamit ang salakyan pa sang Bacolod City Government nga gin-augment para sa Libre Sakay agud macater ang mga nastranded nga pasahero tuga sang duha ka adlaw nga transport strike.
Suno kay Benitez, dapat nga matumod ang ginhalinan sang mga sala nga impormasyon, nga ginpatihan man sang madamo, kag dapat nga mahatagan sang penalidad agud mangin leksyon sa iban nga mangin mahinalungon sa ginapost sa social media.
Nahibaluan nga sa mga post, may mga alegasyon nga may mga indibidwal nga gin-abduct ukon gintuyo nga kidnapon, apang wala man sang bisan isa nga police records.
Gincontact man sang Public Information Office sang Bacolod City Government ang mga nasambitan nga nagpost apang wala nagasabat kag kalabanan ang nagdeactivate na./
Ang pagpost sang mga fake news nga nakatuga sang panic, ang ginpaanggid sang alkalde sa bomb threat, nga dapat hatagan man sang nagakaigo nga penalidad.
