Apisar nga malayo pa nga mangin Super City, ginpasalig ni Mayor Alfredo ‘Albee’ Benitez nga makita na ang amat-amat nga pag-asenso sa ciudad sang Bacolod.
Sa State of the City Address (SOCA) kagab-i, ginpadayaw sang alkalde ang mga madinalag-on nga programa sang iya administrasyon nga nakabulig gid sa mga Bacolodnon.
Isa diri ang Bacolod Comprehensive Health Program (BacCHP) nga nakabulig sa pagpa-ospital sang madamo nga Bacolodnon.
Plano sang alkalde nga dugangan ang benepisyo sang BacCHP kag lakipan na sang mga botika para sa paghatag sang libre nga bulong.
Isa man sa ginapadayaw sang alkalde ang Housing Project kun sa diin 296 na ka mga housing units ang nahuman sa Phase 1 sang Yuhum Asenso Housing sa Arao rellocation site sa Barangay Vista Alegre.
Apang sa pihak sang mga madinalag-on nga programa, aminado si Benitez nga may mga proyekto nga naatrasar bangod ginakonsiderar sang alkalde ang opinyon kag reklamo gikan sa mga maapektuhan nga pumuluyo kag stakeholders.
Kalakip diri ang rennovation kuntani sang Burgos Public Market kag Manokan Vendors.
Suno sa alkalde ang temporaryo nga inconvenience nga mabatyagan ang may kabaylo nga long term nga kaayuhan, kaangay sang towing nga madamo sang nagapamalabag sa umpisa apang napamatud-an nga makabulig sa pagpahagan-hagan sa problema sa trapiko.
Ginpadayaw man sini nga pinaagi sa effort sang City Government napanubo ang rate sang kuryente, samtang gilayon man nga ginhimuan sang tikang ang problema sa tubig matapos magpirma sa kontrata sa Bulk Water project kasubong man dugang nga supply gikan sa Bukal Bukal Spring kag Injection Point Number 2 sang banwa sang Murcia.
Apang pahanumdom sang alkalde nga ang tanan ang indi mahimo nga siya lamang kag kinahanglan ang pagbuligay sang tanan bangod ini ang para malab-ot ang master plan nga mangin Super City ang Bacolod.
