Gina-engganyo sang Office of the Mayor sa mga Barangay nga magpartisipar sa Business One Stop Shop sa Bacolod City Government Center.
Sa interview kay Secretary to the Mayor Atty Marty Go, una na nga naka-issue sang Executive Order No. 67 si Bacolod City Mayor Alfredo “Albee” Benitez nga nagamando sa tanan nga Barangay nga magpartisipar sa Business One Stop Shop magluwas sa nagkalainlain nga mga government offices.
Ang statement ang ginpagwa matapos matalupangdan sang Business Permits and Licensing Office nga masobra napulo ang Barangay nga wala sang desk.
Bilang serbisyo publiko, gin-athag ni Go nga obligasyon sang Barangay nga maghamtang sang ila nga desk agud may dangpan ang ila nga mga constituents nga magakinahanglan sang Barangay clearance kag iban pa nga assistance.
Nakalab-ot naman sa alkalde ang report kag tinalikdan nga semana si Benitez ang nakigsapol naman sa Department of Interior and Local Government kag Commission on Audit sa mga tikang nga mahimo sa nagpartisipar kag wala nagpartisipar.
Suno kay Go, magadepende kay Benitez ang desisyon kun ano ang mga plano sini agud mas ma-encourage pa ang mga nagpartisipar, kag ang mga tikang sa mga wala nagpartisipar.
Paathag sang Secretary to the Mayor nga ang Business One Stop Shop ang gin-extend tubtob sa Pebrero 15 gani ang mga Barangay nga wala nagpartisipar, ang may tion pa nga makabutang sang ila nga desk.
