Ang klaripikasyon sang Department of Agrarian Reform (DAR) nga wala nalakip sa Comprehensive Agrarian Reform Program (CARP) ang ginbakal nga duta sang Bacolod City Government sa Barangay Granada, ang nagapakita nga wala sang basehan ang mga ginahaboy nga alegasyon.
Madumduman nga naglapta sa social media ang kopya sang mga dokumento nga nagapakita sang pagfile sang complaint ni certain Roger Ledesma, batok kanday Bacolod City Mayor Alfredo “Albee” Benitez kag mga miyembro sang City Council kag ginsumiter sa Office of the Ombudsman.
Gina-alegar sini nga overpriced ang pagbakal sang duta kag gina-alegar nga covered sang CARP ang 74 ektaryas nga duta.
Suno kay Benitez, tubtob sa karun, wala pa ini sang nabatun nga notice gikan sa Ombudsman.
Pahayag sang alkalde, nga ang statement sang DAR, ang pamatuod nga baseless ukon wala sang basihan ang alegasyon.
Una naman nila nga ginpasalig nga naglabay sa nagakaigo nga legal nga proseso ang procurement sang propedad.
Madumduman nga una naman gintindugan sang mga miyembro sang konseho nga indi overpriced ang duta bangod sa pagtsekyar sang zonal value sang Bureau of Internal Revenue, ang duta sang ginbakal ang nagabalor P1,500 per square meter, apang ila nga ginbakal sa balor nga P1,300 per square meter.
Apang sa karun ang balor sang duta ang nagsaka na sa P1,700 per square meter.
