Ginpahayag sang political analyst nga may konflikto sa tunga nanday Bacolod City Lone District Congressman Greg Gasataya kag Abang Lingkod Partylist Representative Joseph Stephen “Caraps” Paduano, gani sa Team El Cid nag-upod si Paduano.
Sa interview sang Bombo Radyo Bacolod kay Atty Jomax Ortiz, antes paman nag-abot si Gasataya, malawig na nga naga-updanay si Bacolod City Mayor Alfredo “Albee” Benitez kag Paduano.
Suno diri, may ideya na ini sa rasun sang away sang duha ka kongresista, apang wala lamang sini ginbuyagyag sa kahanginan.
Pahayag ni Ortiz nga si Albee ang “torn between two lovers” ukon naipit sa away sang duha sini ka palangga, kaangay man sa sitwasyon sa karun ni Senator Imee Marcos nga naipit sa away sa tunga sang Duterte kag Marcoses.
Suno kay Ortiz, sadto kun diin nga pungsod magkadto si Albee, yara gid sa tupad sini si Caraps.
Ginpaanggid sini sanday Gasataya kag Paduano nga left hand kag right hand man ni Mayor Albee kag ini ang napilitan nga magpili sang isa lamang nga gamiton.
Ginalantaw ni Ortiz nga ginatinguhaan man ni Albee nga makay-o ang relasyon sang duha, apang karun nga tanan nga tawo ni Paduano ang wala na sa City Hall, nagapakita lamang nga madalom gid ila konflikto.
Bangod sa napilitan nga magpili, nagdesisyon si Benitez nga ipabilin ang tandem kay Gasataya subong nga 2025 Midterm Elections, nga rasun man agud magsuporta si Paduano sa Team El Cid.
