Gin-athag sang alkalde sang Bacolod City nga indi “depleted” ang budget sang ciudad kag ang ginatumod sang kampo sini nga 22 percent na lamang nga nabilin nga pondo amu ang iya ka general services sang City Mayor’s Office para sa mga job order casuals.
Madumduman nga ginpahayag ni Atty. Bong Dilag, tagpamaba ni Mayor Alfredo Benitez, nga ang balance sang City Mayor’s Office sa idalum sang administrasyon ni former Mayor Evelio “Bing” Leonardia sang bulan sang Mayo ang yara sa P160.6 million apang as of June 2022, yara na lamang sa P78.4 million.
Suno kay Dilag, yara sa P82 million ang difference sa budget sang City Mayor’s Office sa bulan sang Mayo kag Hunyo.
Sang Miyerkules, ginpahayag naman ni Dr. Chris Sorongon, tagpamaba ni Mayor Evelio “Bing” Leonardia, nga sa data nga iya nakuha nagikan sa anay alkalde kag sa mga department heads nga nagturn-over sang mga dokumento, sa P3.2 billion nga kabug-usan nga budget sang ciudad, P1.6 billion ang nabilin ukon 51.80 percent sang yearly budget nga gin-alokar para sa ciudad.
Suno sa iya, 41.20 percent lamang ang nagasto sang anay administrasyon sa kabug-usan kag 51.80 percent sang budget ang gin-endorso sa administrasyon ni Benitez gani wala sang kamatuoran nga gamay na lamang ang nabilin nga pondo sa masunod nga anum ka bulan.
Gin-athag naman ni Mayor Alfredo Benitez nga indi “depleted” ang budget sang Bacolod kag ang 22 percent nga nabilin nga pondo ang iya lamang sang City Mayor’s Office para sa general services para sa mga job order casuals.
Suno diri, sarang pa sila nga makaduso sang mga programa kag mapatuman ang iya 8-point agenda projects bangud may budget ang ciudad.
Sa karun, suno sa alkalde, yara pa sila sa proseso sang pagtumod kun pila gid ka mga job order casuals ang kinahanglanon sang ciudad.
