Mayor Alfredo Benitez, nagpanugyan sa mga SK chairman nga magdesisyon santo sa ila nga personal preferences

Kadungan sang eleksyon sang Sangguniang Kabataan federation sa ciudad sang Bacolod subong nga adlaw, nagpanugyan si Mayor Alfredo Benitez sa mga SK chairman nga magdesisyon santo sa ila nga personal preferences.

Suno kay Benitez, dapat nga botohon sang SK chairman ang kandidato nga ila nakursunadahan kag indi kun sin-o ang ginhambal sa ila nga botohon.

Sa pagpakigsapol ni Benitez sa 59 ka mga SK chairman kagab-i, ginpanugyanan niya ang mga ini nga indi magpaimpluwensya sa external forces.

Suno sa iya, tion na agud nga ligwaton ang sistema sang pulitika kag magdesisyon santo sa ila kaugalingon nga idealism.

Nahibaluan nga 61 ka mga barangay ang yara sa Bacolod kag wala ginpahibalo sa mga katapo sang media kun sa diin ang venue sang binotohay.