Ginapaaresto na sang komitiba si Senator Risa Hontiveros si suspended Bamban, Tarlac Mayor Alice Guo bangud sa wala ini nagtambong sa ginapatigayon nga imbestigasyon sang Senado natuhoy sa Philippine Offshore Gaming Operators hub sa iya banwa.
Sa senate hearing nga ginpatigayon kahapon sang committee on women, children, family relations, and gender equality ni Hontiveros, si Senate President Pro Tempore Jinggoy Estrada ang naghingyo nga magpagwa sang arrest order batok kay Guo.
Ginhingyo man ni Senator Sherwin Gatchalian nga i-cite in contempt si Guo kag ang iya mga himata nga una na nga ginpasubpoena sang komitiba apang wala sa gihapon nagpakita sa hearing.
Suno kay Gatchalian, indi makumpleto ang mga hearing kun wala ang nasambit nga mga personalidad.
Una naman nga ginpahayag ni Senate President Francis “Chiz” Escudero nga pagapermahan sini ang warrant of arrest batok kay Guo kun ini ang pagahingyuon sang komitiba.
Suno kay Hontiveros, santo sa ginpadala nga sulat ni Guo, ginpahayag sang alkalde nga indi ini makatambong sa hearing bangud sa health kag mental health concerns apang wala sang medical certificate ang nasambit nga sulat.
Suno sa Senadora, ang mga pahayag sang alkalde sa sulat ang wala sang kredibilidad.
