![](https://img.bomboradyo.com/bacolod/2024/06/MAYOR-ALICE-GUO.jpg)
Gintawag ni Bamban, Tarlac Mayor Alice Guo nga “demolition job” ang mga alegasyon nga siya ang yara sa likod sang mga pagpamahog nanday Senators Sherwin Gatchalian kag Risa Hontiveros nga naga-imbestigar sa karun sang iya identity kag kaangtanan sini sa illegal Philippine Offshore Gaming Operators (POGOs).
Si Gatchalian ang nagpakig-angot na sa Philippine National Police agud ireport ang isa ka online video nga nagapahayag nga ginmanduan ni Guo ang iya mga tinawo nga pahipuson ang mga ini sa baylo sang P5 million kada isa.
Suno kay Atty. Stephen David, legal counsel ni Guo, sang iya nakahinun-anon ang alkalde, ginpahayag sini nga sa iya na lamang tanan ginapasibangod kag wala ini sang ihibalo nayuhoy diri.
Nagsuhestiyon pa si Guo kay Gatchalian nga ipatawag ang nasambit nga vlogger.
Ginhangkat man ni David ang mga ginaalegar classmates ni Guo sa Grace Christian High School, nga sa karun Grace Christian College na, nga magwa kag hambalon ang ila mga nahibaluan natuhoy kay Guo kag sa Chinese nga si Guo Hua Ping.
Suno diri, sa karun wala pa nakadesisyon ang alkalde kun magasurrender ini sa Senado ukon magatambong sa masunod nga hearing sa Hulyo 29.