Sarang gihapon nga makafile sang iya Certificate of Candidacy (COC) para sa 2025 midterm elections si suspended Bamban, Tarlac Mayor Alice Guo kun luyag sini nga liwat nga magpadalagan.
Ini apisar sang nagkalain-lain nga mga kaso kag akusasyon batok sa iya basta wala pa ini mapamatbatan nga guilty suno kay Commission on Elections (Comelec) Chairman George Garcia.
Suno kay Garcia, ministerial lamang ang ila duty gani ila pagabaton ang tanan nga COCs.
Ang final judgement ang magagikan sa Korte Suprema kun mapamatbatan nga guilty si Guo sa maskin ano nga kaso batok sa iya kag magafile ini sang appeal.
Kun makakita ang Comelec sang nagakaigo nga basehan agud magfile sang election offence, sarang sini nga mapunggan sa pagpili si Guo.
Sa karun gina-imbestigahan pa sang Comelec ang posible nga misrepresentation ni Guo sa iya 2022 certificate of candidacy kag magapasa ang ila Law Department sang rekomendasyon sa en banc agud magfile sang election offense sa Regional Trial Court.
