Ginhatagan sang atensyon sang alkalde sang syudad sang Bacolod sa iya nga State of the City Address (SOCA) ang luyag sini nga pagbag-o sa sulod sang Bacolod City Government.
Pahanumdom ni Bacolod City Mayor Alfredo “Albee” Benitez, nga kun ano ang nakaandan nga gawi sang una nga indi maayo, kaangay sa mga nagapabaya sa trabaho, ang dapat nga islan na.
Agud matransform ang Bacolod kag mangin Super City, kinahanglan nga matinlo, efficient, kag people centered ang panggobyerno.
Suno sa iya, wala gid sini ginatolerar ang corruption, kasubong man abuse kag neglect of duty.
Pahanumdom sini nga siya ang may-ara na sang nasampolan.
Madumduman nga pila ka mga empleyado sa Bacolod City Government kalakip na ang isa ka job order casual, ang nakaangkon sang penalidad bangod sa paglantaw sang telebisyon sa tion sang office hours.
Pahanumdom sini nga kinahanglan nga bag-uhon na ang work culture sa BCGC kag ipakita ang disiplina, maayo nga work ethics kag flexibility nga nagakaigo sa public service.
Luyag sini nga mabalik ang pagsalig sang tawo sa Government Center, gani sa iya administrasyon, dapat mauntat na ang daan nga sistema kag madula na ang ghost employee, ghost beneficiary kag ghost project.
Sa pagpungko sa opisina, nagtukod man ini sang Good Governance Committee para bag-uhon ang procurement process agud maseguro nga insakto ang paggamit sang pondo sang syudad.
Ginasiguro sini nga transparent kag competitive ang bidding para sa supplies kag services nga kinahanglan.
Bangod sini, sila ang nakasave na sang kabug-usan nga P43 million.
