Nagpaandam na si Bacolod City Mayor Alfredo “Albee” Benitez batok sa mga junk shop nga nagapamakal sang mga kinawatan nga kable sang kuryente kag cell site batteries.
Ginalantaw nga kadam-an sa mga junk shop owners partikular na ang mga madugay na sa nasambitan nga negosyo, ang may indikasyon na kun ang mga ginabaligya sa ila ang kinawatan.
Madumduman nga magluwas sa panibag-o nga issue, nangin lapnagon man ang problema sa kinawatay sang telecommunication lines sa syudad gani nagpatigayon naman sang inventory sa tanan nga mga rehistrado nga junk shop sa syudad.
Panindugan sang alkalde nga indi lamang ang junk shop nga nagbakal sang kinawatan nga cell site battery ang ila nga tutukan kundi tsekyaron man ang iban nga junk shop agud matumod kun may ara sang iban pa nga nagabuhat sang kaangay nga bayolasyon.
Panawagan ni Mayor Benitez nga magkoordinar sa kapulisan hinali nga may mahibaluan nga nagabaligya sang kinawatan, samtang paandam naman sini nga ang mga madakpan sa pagbakal sang kinawatan ang may pagapangatubangon nga penalidad.
Ang madakpan nga junk shop ang mahimo nga makuhaan sang business permit samtang sila ang magapangatubang man sang kaso sa paglapas sa Anti Fencing Law.
