Aminado si Bacolod City Mayor Evelio Leonardia nga dako nga pagpanghangkat para sa city government ang pagpasaka sang kumpyansa sang mga Bacolodnon sa COVID vaccine apang nagalaom ini nga makabulig ang pagpabakuna sang mga doktor sang Sinovac vaccine sang Biyernes sang aga.
Sa Zoom interview sang Bombo Radyo Western Visayas kay Leonardia upod ang mga gobernador sa Region 6, indi ordinaryo ang rekord sang lima ka medical doctor kag isa ka nurse nga nagpatublok sang Sinovac vaccine kadungan sang ceremonial inoculation sa lobby sang Bacolod Government Center matapos madaho sang ciudad ang bakuna nagikan sa national governmment.
Suno sa alkalde, naintindihan sang mga doktor ang epekto kag bentaha sang Sinovac vaccine kag wala sang isa sa ila nga naglain ang pamatyag.
Madamo naman sang nabakunahan sa bilog nga kalibutan suno kay Leonardia kag wala man sang nagbatyag sang malala nga side effects.
Ginaako sang alkalde nga “wait and see” ang ginahimo sa karon sang mga Bacolodnon apang siya ang nagalaom nga una lang ang resistance kag magakambyo ini kun mapanilagan nga maayo ang epekto sang bakuna.
Nag-apela man ini sa mga Bacolodnon nga likawan ang pagpati sa fake news ukon pagpatalang angot sa COVID vaccine.
