Apisar nga wala natigayon ang selebrasyon sang Masskara Festival sini nga tuig bangud sa COVID-19 pandemic, padayon nga nagalaom ang alkalde sang Bacolod City nga temporaryo lang ang krisis kag makabalik man sa normal ang tanan.
Suno kay Mayor Evelio “Bing” Leonardia, aminado ini nga tanan sa Bacolod ang nahidlaw gid sa Masskara Festival.
Suno sa iya, indi kompleto kun wala ang ini nga selebrasyon bangud nangin icon kag identity na ini sang Bacolod.
Suno diri, nangin kabahin naman ini sa presentasyon sa League of Cities of the Philippines kag nagapakita kun paano magkalipay apisar sang trahedya.
Ini man ang nagapakita sang resiliency sang mga Bacolodnon kag indi ini mangin posible kun wala ang mga pumuluyo.
Nagalaom ini nga temporaryo lamang ang krisis kag ang importante amu ang ispirito, motibasyon kag ang pag-apresyar sang selebrasyon.
