Nagpanugyan ang alkalde sa syudad sang Bacolod sa mga pumuluyo nga sa pagdesisyon sang mga ini sang pagapilion nga alkalde sa 2022 election, mas maayo nga tan-awon ang improvement sa syudad humalin 2004 tubtob karun nga tuig, kasubong man ang improvement sa Northern Negros partikular na sa Victorias City sa kaangay nga mga tinuig.
Suno kay Bacolod City Mayor Evelio “Bing” Leonardia, full time ang trabaho sini bilang alkalde kag wala na ini sang iban nga negosyo kundi ang 24/7 nga pag-ulikid sa ikaayo sang siyudad.
Kahapon, nakigsapol ang alkalde sa mga mechanical engineers kag ginpatpat niya diri ang COVID-19 situation sang syudad kun sa diin nagafocus ang mga ini sa pagpakigbato sa balatian.
Kadungan sini, ginhagad man ni Leonardia ang mga engineers nga tipunon ang ila nga mga katapo kag mga pamilya para sa pagpabakuna, bangod bukas man ang Emergency Operation Center (EOC) nga magpadulong sa ila agud mag-inoculate.
Aminado naman ini nga indi malikawan ginalaktan sang pamulitika ang mga programa may-kaangtanan sa pagpakigbato sa COVID-19.
Apang nagapati si Leonardia nga ang mga pumuluyo na ang makahusga kun sin-o ang ila makita nga nagaresponder gid sa problema dala sang COVID-19 pandemic.
Makita man sang mga Bacolodnon kun sin-o ang focus sa pagtrabaho kag kun sin-o ang nagaconcentrate lang sa pamulitika.
Suno sa alkalde, ang kontra partido ang may signal nga letter C nga nagakahulugan sang “CHANGE” santo sa mga ini.
Apang pahayag ni Leonardia nga indi man gihapon makabig nga change bangod ang mga kandidato sang mga ini ang recycled na santo termino nga masami gina-usar sang palibot batok sa pihak nga partido.
Sa pihak nga bahin, ang Grupo Progreso kag ang ila nga mga supporters ang nagapanawagan man sang letter C nga para sa ila nagakahulugan “CONTINUITY”.
Ginpahanumdom man sang alkalde sa mga Bacolodnon nga natawo na sang 2004, sang ini ang liwat nga nagpungko sa pagka-alkalde kun ano ang nangin kahimtangan sang syudad tubtob sang 2019.
