Ginmando ni Bacolod City Mayor Evelio “Bing” Leonardia ang pagtukod sang task force nga magaimbestigar sa nagluntad nga sunog sa Java Pension House sa corner Gonzaga-Locsin Streets, Bacolod City kun sa diin anom ang nagkalamatay.
Kaina, nagbisita si Leonardia sa lugar kag nagpabriefing kay Fire Marshal Fire Chief Inspector Publio Ploteña.
Pagkatapos sini, ginpasalig ni Leonardia ang pagpatigayon sang maid-id nga imbestigasyon gani isa ka task force ang tukuron kag ini ang pangunahan ni Ploteña.
Sa tion nga matuod ang pahayag nga may mga persona nga nagsunog sang helmet kag naghaboy sini sa ground floor suno kay Leonardia, mahimo sila nga magapangatubang sang kaso kriminal gani dapat nga padalman ini sang kapulisan.
Nagpalab-ot sang simpatiya ang alkalde sa pamilya Java pagkatapos sang kamatayon sang tag-iya nga si Christopher kag bata sini nga si Miguel Java.
Sa karun, suno kay Leonardia, indi pa mabasol ang pamilya Java bangud sa natabo kag mahimo nga may yara sang iban nga sirkumstansya nga nagresulta sa makahalanusbo nga trahedya.
Sa interview kay Dodong Bascon nga tag-iya sang anay Bascon Hotel nga amo na subong ang Java Pension House, gin-ako sini nga daan na ang building.
Bulan sang Enero tuig 1965 sang una nga nag-operate ang Bascon Hotel apang makaligad ang 40 anyos, ginbayaan ini sang pamilya Bascon kag nahimo nga Java Pension House.
Aminado si Bascon nga tuman ang iya kasubo sang nahibaluan nga nasunog ang building kag nalakip si Java nga malapit naman sa ila.
Suno diri, madamo ang mga butang nga iya madumduman nga ginpatigayon sa Bascon Hotel bangud ini ang pinakabantog sa Bacolod antis pa man nag-ulhot ang iban nga accomodation facilities.
