Nagpagwa sang Executive Order No. 48 ang alkalde sang ciudad sang Bacolod nga naga-extend sang modified general community quarantine (MGCQ) tubtob Hulyo 31.
Ini matapos gin-anunsyar ni Presidential Secretary Harry Roque ang desisyon sang national inter-agency task force against COVID-19 nga ipabilin sa MGCQ ang ciudad.
Sa interview sang Bombo Radyo kay Mayor Evelio “Bing” Leonardia, gina-antisipar na sini nga magapabilin sa MGCQ ang status sang ciudad apang bangud indi basta-basta makadesisyon ang local government, ginhulat anay sini ang anunsyo sang national IATF antes magpagwa sang executive order.
Suno kay Leonardia, apisar nga may mga impormasyon nga ibalik sa general community quarantine (GCQ) ang Bacolod bangud sa padayon nga pagsaka sang kaso, nagpadala ini sang sulat sa national IATF nga nagahingyo nga ipabilin lang sa MGCQ ang ciudad.
Nalakip sa kaundan sang sulat nga kun magbalik sa GCQ ang Bacolod, maapektuhan ang ekonomiya kag pag-operate sang madamo nga mga establishemento.
Gindugang man sang alkalde nga ang mga dugang nga mga kaso ang kalabanan mga LSI kag OFW.
Kagab-i, gin-anunsyar ni Roque sa televised speech ni Presidente Rodrigo Duterte nga nalakip ang ciudad sang Bacolod sa mga magapabilin sa modified general community quarantine.
Kahapon sang hapon, nag-issue man sang EO si Negros Occidental Governor Eugenio Jose Lacson nga naga-extend sang MGCQ sa probinsya.
