Bisan nagsugod na sa pagnubo ang numero sang mga residente nga natapikan sang coronavirus disease sa ciudad sang Bacolod, kampante si Mayor Bing Leonardia nga mapuslanon gihapon ang duha ka isolation kag quarantine rooms nga ginpahimo sang Department of Public Works and Highways.
Biyernes sang aga, ginturn-over sa city government ang 32 rooms sa Barangay Alijis kag 45 rooms sa evacuation center sa Barangay Vista Alegre.
Ang una nga 32 rooms ang nakumpleto kag naturn-over sa city government sang Oktubre tuig 2020 samtang ginturn-over naman kahapon ang dugang nga 32 rooms nga nagkumpleto sang 64-room facility.
Ang duha ka units nga pasilidad ang nagabalor sang P50 million kag ginpondohan sang DPWH.
Suno kay Leonardia, importante ang pasilidad bangud wala pa nagtahaw ang pandemic kag indi mapaktan kun ano ang sitwasyon sa masunod nga mga binulan.
Tubtub nga indi mabakunahan ang kalabanan nga mga tawo suno sa alkalde, indi pa makapahuway ang publiko gani indi dapat nga magkampante.
Ang rekord sang Department of Health Region 6 nagapakita nga ang Bacolod ang may yara sang zero cases sang March 4, 6, 8, 9, 10, kag 12 samtang may tag-isa naman ka kaso sang March 2 kag March 3; kag duha ka kaso sang March 11.
Suno sa chief executive, nagapabilin pa ang COVID pandemic kag sa pagkamatuod, nagsaka naman ang kaso sa Metro Manila subong nga semana kun sa diin napilitan ang mga alkalde nga magpatuman sang mas hugot nga protocol.
