Nagaapelar ang alkalde sang ciudad sang Bacolod sa mga pumuluyo nga ipaiway lang anay ang mass gathering kag pagpatigayon sang Christmas party agud malikawan ang posible nga paglapta sang coronavirus.
Sa interview sang Bombo Radyo kay Mayor Evelio “Bing” Leonardia, nagahingyo ini nga apisar nga Paskwa, unahon anay ang paghalong sa COVID-19 sang sa cultural practices bangud ang virus ang wala nagapangilala sang Christmas ukon New Year.
Suno kay Leonardia, apisar nga naganubo na ang numero sang kaso sa ciudad sang Bacolod, indi dapat mangin complacent kag magpakampante ang mga pumuluyo.
Gindugang man sini nga ang Paskwa ang indi dapat maghatag sang sala nga seguridad sa tanan kag tubtob nga may yara na sang bakuna, kinahanglan gihapon nga maghalong.
Nagapangabay ini nga magsakripisyo lang anay bangud kun maayo na ang sitwasyon sa masunod nga tuig, sarang na nga makabalik sa normal ang tanan.
Nagpahanumdum man ini nga ang pinakadako nga regalo nga mahatag sang isa ka persona sa iya mga pinalangga amu ang pagsunod sa health protocols.
