Ginkompirmar sang chairman sang inter-agency task force against coronavirus sang Bacolod City sang Bacolod nga kun mahuman na ang mga citation tickets kag print out nagikan sa City Health Office, magasugod na panglibot ang mga katapo sang Task Force Disiplina agud masiguro nga nagatuman sa mga health protocols ang mga pumuluyo.
Sa interview sang Bombo Radyo kay Vice Mayor El Cid Familiaran, ginpahayag sini nga nagpatigayon sila sang pamulong-pulong kahapon nahanugod sa Task Force Disiplina kag ini an ginalakipan sa mga IATF, Bacolod City Police Office kag City Health Office.
Suno kay Familiaran, target nila nga makasugod na panglibot sa Agosto kag mangdakop sang mga pumuluyo nga wala nagasuksok sang face mask kag naga-obserbar sang social distancing apang ang mga nagalapas sa curfew ang ila na ginatugyan sa mga kapulisan.
Suno sa bise-alkalde, ang mga madakpan ang pagapasakaan sang kaso kun indi ang mga ini makabayad sang multa.
Nagalaom man si Familiaran nga aprubahan sang national IATF ang hingyo ni Mayor Evelio “Bing” Leonardia nga mapabilin sa modified general community quarantine (MGCQ) ang status sang ciudad.
Suno sa iya, 64 man lang ang kaso sa Bacolod kag 80% diri ang mga locally stranded individuals kag overseas Filipino workers.
Suno sa bise-alkalde, kun mabalik sa GCQ ang ciudad, maapektuhan gid ang ekonomiya kag madamo nga mga establishment ang indi pagpahanugutan sa pagbukas.
Naga-apelar man ini sa mga pumuluyo nga kun mapabilin gid man ang status sa MGCQ, magsunod lang gihapon sa mga health protocols agud malikawan ang paglapta sang virus.
