Nag-apelar si Bacolod City Mayor Evelio “Bing” Leonardia sa Overseas Workers Welfare Administration (OWWA) sang duha ka semana nga moratorium sa pagpapauli sang mga overseas Filipino workers sa ciudad sang Bacolod.
Ang 2-week moratorium ang ginhingyo ni Councilor Renecito Novero, chairman sang Quarantine Centers Action Team, nga nagpaandam sang health danger sa bilog nga komunidad pananglitan nga magdamo ang mga mapauli nga mga OFWs kag indi na masarangan pa nga maakomodar sang mga hotel agud nga iquarantine.
Sa sulat nga ginpadala ni Leonardia kay OWWA administrator Hans Leo Cacdac, nakasaad diri nga makahatag ang moratorium sang pahuway para sa tanan.
Ang amo nga sulat ang pirmado man nanday Novero kag Councilor Israel Salanga nga chairman sang action team on returning OFWs.
Ginhatagan man sang kopya sang sulat si Jose Roberto Nuñez, regional director sang Office of the Civil Defense-6 kag chairman sang Regional Inter-Agency Task Force.
Samtang, naghingyo man si Leonardia sa National Task Force nga mag-issue sang guidelines nga nagalimit sa mga flights kag ferry trips sa combine total nga 600 ka mga pasahero lamang kada semana.
Nag-apelar man ang alkalde sa NTF nga manduan ang mga airline kag shipping companies nga magpakig-angot sa City Mayor’s Office kag magkuha sang permiso duha ka adlaw antes ang scheduled flight ukon ferry trip sini.
Paagi diri suno kay Leonardia, mahibaluan sang ciudad kun may yara sang bakante nga mga quarantine facilities para sa mga returnees kag mahandaan ang ila nga pag-abot.
