Nagpagwa na sang Executive Order No. 55 series of 2020 si Bacolod City Mayor Evelio “Bing” Leonardia nga nagamando nga magpatigayon sang COVID-19 mass testing sa idalom sang “O-Plan: One Time-Big Time” joint program upod ang provincial government sang Negros Occidental kag iban pa nga mga ciudad kag banwa subong man ang pagpatuman sang citywide “four-day no movement” period sumugod Agosto 28 tubtob Agosto 31.
Nakasaad sa EO nga ang Bacolod inter-agency task force, City Health Office, barangay officials kag Bacolod CDRRMO ang magatukod sang plano angot sa pagtumod sang mga critical areas ukon mga tawo nga mangin kabahin sang programa.
Si Bacolod City Vice Mayor El Cid Familiaran ang ginbutang bilang task force commander para sa mass testing program sang ciudad.
Ginadumilian man ang paghulag sang mga tawo samtang ginapatuman ang “O-Plan: One-Time, Big Time” program sa sulod sang apat ka adlaw magluwas lamang sa mga cargo kag essential services; medical cases; mga Bacolodnon nga nalakip sa testing population; mga government employees; personnel sang national government agencies lakip na ang mga pulis; medical frontliners; drivers sang mga pampubliko nga salakyan; drivers sang mga company-owned vehicles; media practioners; security guards; mga pari; personnel nga kinahanglan magreport sa trabaho sa mga punerarya ukon crematorium; personnel nga kinahanglan magreport sa trabaho sa mga dining ukon restaurant establishments nga limited lamang sa delivery kag take-out; personnel sang mga hotel kag iban pa nga mga accommodation facilities nga nagaserbe bilang quarantine facilities kag mga personnel nga kinahanglan magtrabaho sa mga gintugutan nga mga establisyemento.
Ang mga negosyo nga wala nalakip sa exemptions ang magasirado humalin Agosto 28-31 samtang ang mga public markets naman sa ciudad ang magasirado lamang sugod Agosto 28-30.
Mapahamtang naman sang mga border check-up points sa sulod sang apat ka adlaw agud madumilian ang paggwa-sulod sang mga tawo sa ciudad.
