Gin-abisuhan sang alkalde sang Bacolod City ang mga pumuluyo nga indi magpati sa mga persona nga nagabaligya sang bakuna batok sa COVID-19 ukon mga nagabaligya sang ila slots para sa vaccination.
Sa interview sang Bombo Radyo kay Mayor Evelio “Bing” Leonardia, nag-abiso ini sa mga Bacolodnon nga kun may mag-offer sini sa ila, gilayon ini nga ireport sa mga otoridad bangud mga manug-into ang mga ini.
Gin-athag ni Leonardia nga wala ginabaligya ang bakuna.
Suno diri, sa karun masobra 30,000 na sang COVID-19 vaccines ang na-administer kag halos nagkalaubos na ang mga supply sa ciudad.
Suno diri, nagpangayo siya sang dugang nga shots kay vaccine czar Sec. Carlito Galvez Jr. kag naghatag ini sang masobra 19,400 doses sang bakuna.
Aminado ini nga medyo manubo pa ang 30,000 nga nabakunahan kun ikumparar sa 424,000 nga target sang ciudad apang kun ikumparar ini sa iban nga local government units, mas madamo na ini.
Gindugang man sini nga ang Bacolod City ang ginakabig nga moderate risk sa COVID-19 samtang ang Iloilo City naman ang high risk.
Gin-athag man sang alkalde nga ang curfew kag liquor ban ang napaidalum sa kaugalingon nga ordinansa sang Bacolod.
Nagpangayo man si Leonardia sang kooperasyon sang mga pumuluyo agud macontain ang virus.
