Nagpatawag sang meeting si Bacolod City Mayor Evelio “Bing” Leonardia sa mga hotel kag restaurant owners sa syudad sang Bacolod kahapon.
Suno kay Em Legaspi Ang, Executive Director sa Emergency Operation Center (EOC), ini agud ipalab-ot sa mga ini ang updates sa COVID-19 management sang syudad, kung ano kataas ang kaso kasubong mana ng status sang vaccination roll-out.
Ginlatag man sa meeting ang mga programa sang syudad agud nga malab-ot ang target nga herd immunity.
Tinutuyo man sang mga opisyales sang syudad nga makuha ang kooperasyon sang mga negosyante sa pagpanugyan sa pagpabakuna sa COVID-19 vaccine kaangay sang paghatag sang mga insintibo.
Ginakalipay naman ni Ang nga kalabanan sa mga restaurants kag mga hotels ang naga-offer sang discounts kag freebies para sa mga kustomer sang mga ini nga may vaccination card ukon fully vaccinated na.
Bangod sini, naga-amat amat na lapit ang syudad sang Bacolod sa ginalauman nga herd immunity.
Tinutuyo man sang mga ini sa pagpatigayon sang meeting nga mapanubo ang kaso sang COVID-19 agud nga mas makabukas na ang ekonomiya.
Kadungan pa sa luyag nga matabo ni Ang amo ang mapasaka ang limit sa pahanugutan nga makasulod sa mga hotels ukon restaurant.
Ginapakampanya naman sang mga ini sa mga Bacolodnon pagpabakuna tubtob sa malab-ot ang 70 tubtob 80 porsyento sang populasyon sa Bacolod nga makabulig agud nga mapanubo man ang risgo nga matapikan sang balatian.
Paathag ni Ang nga kun magnubo na ang kaso, kag madamo na sang bakunado sa COVID-19 vaccine, mas mangin mahapos naman ang pagbuksan sang ekonomiya.
Dugang pa sini nga maganubo man ang risgo nga matapikan sang COVID-19 ang kadamuna sang populasyon.
Agud nga indi magsaka ang kaso ginatinguhaan sang mga opisyal nga mapabaskog pa ang preventive measure kag indi na magasaka ang kaso.
Pahanumdom ni Ang nga ginadumilian gihapon ang pagtipon-tipon ukon mass gatherings.
