Naghatag sang warning kag pahanumdom ang alkalde sang Bacolod City sa mga printing press nga gintugyunan nga maghimo sang mga Home Quarantine Pass (HQP).
Suno kay Bacolod City Mayor Evelio “Bing” Leonardia, nakabatun ini sang reklamo nga may-ara sang mga persona nga nagapalapit sa mga printing press nga ginkuha sang ciudad agud nga maghemu sang HQP kag naga-ayo nga personal nga hemuan ang mga ini.
Suno sa alkalde nagmando na ini kay Bacolod City Police Office Chief Col. Henry Biñas nga imbestigaran ang mga printing press.
Madumduman nga sa kada barangay sadto ang pag-imprinta sang HQP sang yara sa enhanced community quarantine status ang ciudad apang nakita nga nangin mahapos ang pagpeke diri.
Sa karun, ginpakamaayo sang alkalde nga mangin centralized ang pag-imprinta sang HQP kag ang ciudad nalang ang magaprint sini samtang iga-distribute naman sa tagsa ka mga barangay santo sa figures kag records nagikan sa Department of Social Services and Development.
Ginalantaw naman ni Leonardia nga mas maayo ang bag-o nga sistema bangod mas may seguridad ini kun ikumparar sadto.
Apang pahanumdum sang alkalde nga maguba ang purpose sang ciudad kun may-ara man gihapon nagapalusot sa printing press.
Nagapanugyan naman ini sa publiko nga gilayon nga ipahibalo kun may matukiban nga kaangay nga hitabo.
Ang liwat nga pagdihon sang HQP ang santo sa request sang mga doktor sa ciudad nga time-out kag ginkasugtan naman sang nagkalainlain nga sektor.
Suno sa alkalde ang tinutuyo sang programa amo ang mapunggan ang movement sa ciudad.
Madumduman nga ginapanugyan sang mga doktor nga matapna ang paglapta sang virus kun maga-untat sa paggehu ang mga tawo.
Ginapasalamat naman sang alkalde nga nagdihun sang ordinansa si Councilor Renecito Novero nga liwat nga ibalik ang HQP system sa ciudad samtang madasig naman ang nangin paggehu sang mga konsehal.
