Nagpagwa sang Executive Order no. 56 si Bacolod City Mayor Evelio “Bing” Leonardia nga nagatuyo sa pagkakas sang implementasyon sang Executive Order no. 55 sa Bacolod agud liwat na nga magabalik ang pagpatuman sa modified general community quarantine (MGCQ).
Madumduman nga ang EO no. 55 ang ginbuhat para sa igapatigayon nga mass testing sa ciudad sa idalum sang “O-Plan: One-Time Bigtime” program sang Provincial Government sang Negros Occidental.
Ginapartisipahan naman ini sang Bacolod City kag pili nga mga Local Government Units (LGU) sa probinsya.
Sa kumpirmasyon ni Bacolod City Vice Mayor El Cid Familiaran, ginpahayag sini nga liwat na magabalik ang mga pagpatuman sa ciudad sa MGCQ kaangay sa curfew nga sumugod alas-8:00 sang gab-i tubtob alas-4:00 sang kaagahun.
Magapabilin naman ang pagsarado sang mga mayor nga merkado sa ciudad sa kada Dominggo nga ginalakipan sang Central Market, Burgoz Market kag Libertad Market para sa disinfection.
Amat-amat naman nga pagapaluson ang mga border check-up points nga gintukod sa ciudad sa pagpatuman sang programa.
Apang ginaklaro sang bise alkalde nga indi nagakahulugan nga ginpalos na ang pagpatuman, magalumbayag na ang mga pumuluyo.
Ginapaathag man sini sa mga nakigbahin sa swab test nga kun mag gwa ang resulta sang test kag magnegatibo ang mga ini, indi nagakahulugan nga indi na matapikan sang balatian.
Ginalauman naman nga subong nga adlaw magabalik na ang mga operasyon sang mga negosyo.
Gin-athag ni Familiaran nga ang rasun kun ngaa makigbahin kuntani ang ciudad sa “Four Day No Movement” sumugod Agosto 28 tubtob 31 amo ang makabulig sa pagtapna sang paglapta sang balatian.
Suno pa diri, ang apat ka adlaw naman kuntani ang mangin sabat sa paghingyo sang mga doktor sang time out.
Apang ginkumpirmar naman ni Familiaran nga daku ang nahemu sang duwa ka adlaw sa pagtapna sang nagalapta nga balatian.
Kung nadayun naman ang “Four Day No Movement” nagapati ang bise alkalde nga daku pagid ang ma-iban sa COVID cases sang ciudad.
Ginapangabay naman sini nga indi pagkalimtan ang nagapanguna nga rasun sa atun mga pagpangabudlay.
Dugang pa sini nga daku man ang mabulig sang isa ka adlaw nga pagsarado sang mga mayor nga merkado kada Dominggo sa pagpahagan-hagan sang paglapta sang balatian.
Daku naman ang pagpasalamat sang bise alkalde sa pag kooperar sang mga pumuluyo kag nakita sini nga madamo ang nakaintindi kung anu ka delikado ang COVID-19.
