Nagpagwa sang Executive Order 58-C si Bacolod City Mayor Evelio “Bing” Leonardia nga magapalawig sang pagpatuman sang Home Quarantine Pass kag Border Check-up Points sa Bacolod.
Suno kay City Administrator Em Ang, pinuno sang Emergency Operation Center (EOC) sang ciudad, ang HQP kag Border Check-up Points nga gin-issue pinaagi sa EO 58, ang nakasandig sa ordinansa sang Sangguniang Panlunsod nga nagahatag sang otoridad sa alkalde nga magpatuman sang mga kasuguan sa ciudad sa tion sang emerhensya.
Ang otoridad sang alkalde ang may limit lang nga duha ka semana nga natapos na kahapon, Setyembre 19.
Bangod naman sa status sang ciudad nga modified enhanced community quarantine (MECQ) iga-extend pa ang mga pagpatuman pinaagi sa isa pa ka Executive Order.
Pahayag ni Ang nga kanugon kun paga-untatun ang mga pagpatuman karun nga ginatinguhaan nga mapanubo ang cases.
Ang HQP, Check-up Points, Curfew kag pagpauntat sa pampubliko nga transportasyon ang mga ginapatuman sa tinutuyo nga mauntat ang local transmission sang virus kag dapat nga nagacomplement sa kada isa.
Nakigsugilanun naman ini sa City local Officer kag ginpahayag sini nga pilirmahan nalang sang alkalde ang panibag-o nga Executive Order nga maga-extend sang pagpatuman sang HQP kag Border Control Points tubtob sa katapusan sang Setyembre.
Panugyan ni Ang nga ang magamay nga dugang sa kabudlayan ang makahatag naman sang daku nga bulig para sa pagpugong sang paglala sang sitwasyon.
Luyag naman sang ciudad nga mapanubo ang COVID-19 infection pinaagi sa mas agresibo nga testing, contact tracing kag isolation.
Samtang nagbutang naman sang mga dugang nga isolation facility ang ciudad.
Sa mga indi naman makasaho nga magtinir sa mga eskwelahan nga ginhemu nga isolation facility, nagkuntrata naman ang ciudad sang isa lang ka hotel bilang isolation unit.
Pagabayadan naman ini sang mga pasyente apang mangin matawhay naman ang mga ini bangod may-ara sang aircon.
Ginalantaw naman nga daku ang mahimo kun gilayon nga ma-isolate ang mga matukiban nga positibo agud nga wala na sang iban nga malatnan.
