Nagpagwa sang Executive Order No. 70 si Mayor Evelio “Bing” Leonardia tuhoy sang extension sang General Community Quarantine (GCQ) sa Bacolod City halin Nobyembre 1 tubtob Nobyembre 30, 2020.
Madumduman nga matapos gin-anunsyar ni Presidente Rodrigo Duterte sa iya televised speech nga magapabilin ang ciudad sa idalom sang general community quarantine sa bulan sang Nobyembre agud nga mapunggan ang paglapta sang coronavirus sang Oktubre 27.
Matapos ini, nagpadala sang apelasyon si Leonardia agud nga ipaidalum ang ciudad sa MGCQ apang sang Biyernes, ginkumpirmar ni Vice Mayor El Cid Familiaran nga wala gin-aprubahan sang Nationa Inter-Agency Task Force ang hingyo sang alkalde apisar nga pabor diri ang Regional IATF.
Bangud diri, magapabilin ang alas 10:00 sang gab-i tubtob alas 4:00 sang kaagahon nga curfew; pagpahanugot sa pagbaligya sang alcohol halin alas 12:00 sang udto tubtob alas 6:00 sang hapon; kag iban pa nga mga pagsulundan sa idalum sang GCQ.
Magapabilin man nga bukas ang tatlo ka mayor nga merkado kada Domingo samtang 30% na sang setting capacity ang pahanugutan sa mga religious gatherings.
Ang nasambit nga EO ang epektibo subong nga adlaw tubtob sa katapusan sang bulan.
